როგორ მოვაწყოთ ტერასა - უახლესი ტრენდები

საცხოვრებელი ფართის შეძენისას, აივნებსა და ტერასებზე მოთხოვნა უფრო და უფრო იზრდება. უკვე წარმოუდგენელია, კორპუსის ბინებში გარე მოსასვენებელი სივრცის გარეშე ცხოვრება. კარგი ხედი, სუფთა ჰაერი და რაც მთავარია, ტრენდულად მოწყობილი ტერასა, თქვენი კომფორტული ცხოვრების საწინდარია.

საქანელა სკამი, მაყალი, პუფები - თუ ტერასას ჭკვიანურად მოაწყობთ, ეს ადგილი უნივერსალური სივრცე გახდება თქვენთვის, სადაც შეძლებთ მოაწყოთ წვეულება, დაპატიჟოთ სტუმრები, დილით და საღამოს იმედიტიროთ, ივარჯიშოთ, შექმნათ ბარბექიუ ზონა განსაკუთრებული დღეებისთვის, ზაფხულში კი გაირუჯოთ კიდეც.

2025 წელს, ღია სივრცეების მთავარი აქსესუარი გარე ხალიჩებია. გამძლე, მოდური და ეკოლოგიურად სუფთა. ამ მიმართულებით, ბაზარზე პოლიპროპილენის სინთეზური ბოჭკოებით დამზადებული ხალიჩები და ზოგადად, ავეჯი ლიდერობს.

რა არის პოლიპროპილენი და როგორ გამოიყენება

უფრო უკეთ რომ ავხსნათ, პოლიპროპილენი მრავალმხრივი თერმოპლასტიკური პოლიმერია, რომელსაც მისი მსუბუქი და გამძლე ბუნების გამო, ავეჯისა და ტექსტილის დასამზადებლად საკმაოდ აქტიურად იყენებენ. 

პოლიპროპილენი ეკოლოგიურად სუფთაა, რადგან მისი გადამუშავება შესაძლებელია. გარდა ამისა, შესაშური გამძლეობა აქვს სხვადასხვა ქიმიური ნივთიერებების მიმართ. შესაბამისად, უძლებს საწმენდ საშუალებებს და ძლიერ მჟავებს, რაც მის გამოყენებას მარტივს და კომფორტულს ხდის. თუ მაგალითად, წვეულებაზე ხალიჩა უნებურად დაგესვრებათ, ამ პრობლემას რამდენიმე წუთში მოაგვარებთ.

ამ შთამბეჭდავ თვისებებს ისიც ემატება, რომ საკმაოდ ხელმისაწვდომია, რაც მწარმოებლებს საშუალებას აძლევს, პროდუქცია შედარებით დაბალ ფასად გაყიდონ. ასე, იქნება ეს მატრასები, სკამები, ეზოს ფილები, ხალიჩები თუ ეზოს ავეჯი, ბევრად უფრო ბიუჯეტური გამოდის.

ხალიჩებისთვის ინსპირაციად შეგიძლიათ გამოიყენოთ ბოჰო სტილი, რომელიც წელს საკმაოდ აქტუალურია, განსაკუთრებით ზაფხულში. გარდა ამისა, გარე ხალიჩებს ინდივიდუალურ იერსახეს ანიჭებს ბუნებრივ მოტივებზე აგებული ორნამენტებიც.

2025 წლის ტრენდული დიზაინი

ფაქტია, რომ მინიმალიზმი მოდიდან არასდროს გადადის და სავარაუდოდ, არც მომავალში ემუქრება „საფრთხე“. ბუნებით შთაგონებული დიზაინი წელს ტრენდულია. მასალებად შეგიძლიათ გამოიყენოთ ბამბუკი, დაუმუშავებელი ხე, ნატურალური რატანი, ბუნებრივი ქვა. იმისთვის, რომ სივრცე გაალამაზოთ, შეგიძლიათ, ამ მასალებით დამზადებული გასაშლელი მაგიდები და საქანელა სკამები შეიძინოთ. არ დაგავიწყდეთ, რომ წინასწარ გათვალოთ სტუმრების მიახლოებითი რაოდენობა 

გამოიყენეთ ნეიტრალური ტონები: ბეჟი, ღია ნაცრისფერი, თეთრი და ბაცი ცისფერი. შეუხამეთ ეს ფერები მომრგვალებული ფორმის პუფებსა და რბილი ქსოვილით დამზადებულ ავეჯს. იქონიეთ ნაკლები ნივთი, მაგრამ გააზრებულად შეძენილი. ეცადეთ, რომ მრავალფუნქციური გამოყენების ნაკრები შეარჩიოთ.

თუ სხვა კორპუსებთან თქვენი სახლი ახლოსაა და ტერასა მეზობლების ფანჯრებს გადაყურებს, ამიტომ თავს არაკომფორტულად გრძნობთ, ჯობს, ღია სივრცის ერთი ნაწილი დახუროთ და მეტად იზოლირებული გარემო შეიქმნათ.

მართალია, ტერასაზე ღობეს ვერ გააკეთებთ, თუმცა ერთ-ერთი ვარიანტია დამცავი ფარდები, რომელსაც რამდენიმე უპირატესობა აქვს. კერძოდ, მზე, ქარი და წვიმა არ შეგაწუხებთ, ფარდები იქნება გამძლე და წყალგაუმტარი, თანაც, საჭიროებებიდან გამომდინარე, მარტივად იშლება და იკეცება.

რაც შეეხება განათებას, გამოიყენეთ ენერგოეფექტური Led ნათურები, კედლის განათება, არ დაიშუროთ მცენარეებიც, რომელიც თქვენს სივრცეს სიმწვანესა და სიჯანსაღეს შემატებს.

ნივთები, რომლებიც არ უნდა გამოგვრჩეს

ჯერ უნდა გადაწყვიტოთ და არჩევანი გააკეთოთ მაყალი გირჩევნიათ თუ გრილის ზონის მოწყობა, ამიტომ მათ შორის განსხვავებაც უნდა იცოდეთ.

მაყალი როგორც წესი, ოთხკუთხედი ლითონის ან თუჯის კოლოფით აწყობილი კონსტრუქციაა, რომელსაც ქვემოთ მხარეს ნასვრეტები აქვს. ხორცი ერთ დონეზე, შამფურებზე აგებული იწვება.

გრილი ფეხებზე შემდგარ ღრმა ტაპას ჰგავს, რომელსაც თავისი სახურავი აქვს.

ბარბექიუ კი აგურით აშენებულ ღუმელს ჰგავს, რომელსაც ტემპერატურის რეგულირებადი მართვის პანელი აქვს, მისი გამოყენებით შეგიძლიათ ცხობა, ხორცისა და ბოსტნეულის შეწვა ან შებოლვა. ბარბექიუსთვის ცალკე ზონის მოწყობა ძირითადად, კერძო სახლებში, ეზოში ხდება და არა ტერასაზე. გრილის დადგმა ნებისმიერ ადგილზე შეგიძლიათ, მით უფრო, რომ ახლა სხვადასხვა ზომის, ფორმისა და ფუნქციის მოდელები არსებობს და შეგიძლით, არათუ ხარისხისა და დიზაინის, არამედ ბიუჯეტის მიხედვით განსაზღვროთ.

სწორედ Raf-ის ბრენდის გრილები გამოირჩევა მაღალი ხარისხითა და ხელმისაწვდომი ფასებით - დაახლოებით, იწყება 50 ლარიდან და მერყეობს 90-100 ლარამდე.

2025 წელს, რეტრო და ვინტაჟურ დიზაინზე დიდი მოთხოვნაა. შთაგონება აიღეთ 50-იანი, 70-იანი და 90-იანი წლების კომბინაციაზე. რიტანის დასაჯდომები, გეომეტრიული ორნამენტები და მეტალის დეტალები ღია სივრცეებს საოცრად ვინტაჟურ ელფერს სძენს. თუმცა, მთავარი პრინციპი ბალანსშია - შექმნათ თქვენთვის დამახასიათებელი, ინდივიდუალური და სიმყოდროვით სავსე ესთეტიკა, რომელიც ნებისმიერი აქტივობისთვის გამოგადგებათ.

არ დაგავიწყდეთ, რომ ტერასა პატარა აქსესუარებითა და დეკორაციებით გაამრავალფეროვნოთ. ეს შესაძლოა იყოს საყვარელი ჟურნალები, პლედები ან ქანდაკებები, რომელიც სივრცეს ორიგინალურს გახდის. ეცადეთ, თითოეული ფერი და განათება ერთმანეთს შეუსაბამოთ, რათა სივრცე ვიზუალურად კიდევ უფრო გაიზარდოს და განათდეს. დარწმუნდით, რომ ნივთების დაბინავების შემდეგ, საკმარისი ადგილი გაქვთ გართობისთვის და სტუმრების კომფორტულად მისაღებად.