როგორ მოვაწყოთ სამუშაო სივრცე ისე, რომ ჩვენი პროდუქტიულობა გაიზარდოს

საოფისე სივრცის მოწყობაზე პანდემიამდე, ალბათ, ძალიან ცოტა ადამიანს უფიქრია, რადგან კოვიდამდე, დისტანციურ ან ჰიბრიდულ რეჟიმში მუშაობა წარმოუდგენელი გვეჩვენებოდა. კარანტინის დროს სამუშაო სივრცემ სახლებში გადმოინაცვლა, კოვიდის ეპიდემიის დასრულებისა და წლების გასვლის შემდეგ კი მუშაობის ეს სტილი ადამიანთა ცხოვრების განუყოფელ რუტინად ჩამოყალიბდა. ახლა აღარავის უკვირს, თუ კვირაში 2 ოფისიდან, ხოლო დარჩენილი 3 დღე შესაძლებელია, სახლიდან იმუშაო.

მიუხედავად იმისა, რომ დისტანციურ რეჟიმში მუშაობა ბევრი ადამიანისთვის კომფორტულია, რადგან აღარ არის საჭირო 1 საათით ადრე ადგომა მოსაწესრიგებლად და გასამზადებლად, არ იხარჯება დამატებითი ენერგია საცობებში და თანაც, შესაძლებელია მოგებული დროის ეფექტურად განაწილება, სახლში მუშაობას თავისი სირთულეებიც აქვს.

საოფისე მაგიდა, საოფისე სავარძელი ან სკამი, სხვადასხვა ტიპის აქსესუარები, კარგი განათება - ეს იმ საჭიროებების მცირე ჩამონათვალია, რაც სამუშაო პროცესის ორგანიზებისა და მოტივაციის ამაღლებისთვის დაგჭირდებათ. კიდევ ერთი გამოწვევაა, თუკი პატარა ბინაში ინდივიდუალური კაბინეტის ან სივრცის მოწყობის საშუალება არ გაქვთ, სასურველი ავეჯი არ ეტევა ან ბიუჯეტში ხართ შეზღუდულები.

ამ ბლოგში ისეთ რჩევებს გაგიზიარებთ, რომლებიც ტრენდული გარემოს შექმნაში დაგეხმარებათ, გამორჩეული ინტერიერით, სწორი განათებითა და რაც მთავარია, თქვენზე მორგებული ბიუჯეტით.

სად შეგვიძლია სამუშაო სივრცის მოწყობა, თუ ამისთვის გამოყოფილი ადგილი არ გვაქვს

თუ ბინას ახლა ყიდულობთ და თქვენი საქმიანობიდან გამომდინარე, გამოყოფილი კაბინეტის გაკეთებას გეგმავთ, უმჯობესია სახლის ისეთი ზონა შეარჩიოთ, რომელიც მისაღები ან სტუმრების ოთახისგან შორს იქნება. ასე შეძლებთ, ტელევიზორის ან სხვა ტიპის ხმაურს თავი აარიდოთ და შედარებით მშვიდი გარემო შეიქმნათ.

თუ არ გაქვთ იმის ფუფუნება, რომ ისედაც პატარა ფართში ცალკე სივრცე დაუთმოთ კაბინეტს, არც ეს არის პრობლემა. დღევანდელი ტენდენციების გათვალისწინებით, მაგალითად, სტუდიოს ტიპის ბინებში შესაძლებელია ფუნქციური ზონირება. გამოყავით ადგილი დიდი ზომის დასადგამი თაროთი, რომელიც ე.წ “ტიხრის” ფუნქციას შეასრულებს და გაალამაზეთ პატარა და საშუალო ზომის მცენარეებით. 

როგორ შევარჩიოთ განათება

სწორი განათება არამხოლოდ სამუშაო განწყობას აუმჯობესებს, არამედ თქვენს ჯანმრთელობაზეც პირდაპირ აისახება. უპრიანი იქნება, თუ საოფისე მაგიდას იმ მხარეს დადგავთ, სადაც მეტი ბუნებრივი შუქია, მაგალითად ფანჯარასთან ან აივანთან ახლოს. თუმცა ცხადია, კარგი ბუნებრივი განათება ყველა სახლს არ აქვს, ამიტომ ნუ ინერვიულებთ, სწორი ხელოვნური განათებით ეს პრობლემა მარტივად მოგვარებადია. 

სანამ კედლის დეკორატიულ განათებაზე გადავალთ, არ უნდა დავივიწყოთ ნათურები, რომლებიც ერთი შეხედვით უმნიშვნელოა, თუმცა მყუდრო გარემოს შესაქმნელად და ენერგიის დასაზოგად - აუცილებელი წინაპირობა.

განვიხილოთ Led და ვოლფრამის ნათურების უპირატესობები და განსხვავებები. ვოლფრამის ნათურები Led-ისგან განსხვავებით, გაცილებით მეტ ენერგიას მოიხმარს. მათი სიცოცხლისუნარიანობა 1000-2000 საათია. გაითვალისწინეთ, რომ ნათურა ხშირად ძალიან ცხელდება, რაც ზაფხულში ოთახის ტემპერატურაზე მოქმედებს.

Led ნათურა ჩვეულებრივ ნათურასთან შედარებით 85%-ით ნაკლებ ელ.ენერგიას მოიხმარს, მისი სიცოცხლისუნარიანობა კი დაახლოებით, 15 000- 20 000 საათია. კიდევ ერთი დიდი უპირატესობაა, რომ ძალიან იშვიათად ცხელდება და თანაც, მსხვრევადი არ არის. მართალია, ვოლფრამის ნათურის ფასი შედარებით ნაკლებია, თუმცა თუ მათ სიცოცხლისუნარიანობას შევადარებთ, Led ნათურა გრძელვადიან პერსპექტივაში უფრო იაფი ჯდება.

თუმცა, როგორ კარგადაც არ უნდა იყოს განათებული ოთახი, მაინც დაგჭირდებათ კედლის განათება, რომელიც თქვენს სამუშაო კუთხეს განსაკუთრებულ იერსახეს შესძენს. გარდა ამისა, კედლის განათების ელეგანტური და თანამედროვე ვიზუალი ერთგვარი დეკორაციაცაა, რაც ოთახში განსხვავებულ ესთეტიკას შემოიტანს.

როგორი ავეჯი დაგვჭირდება?

• საოფისე ავეჯს ისე არ შეხედოთ, როგორც საქმისთვის აუცილებელ ნივთს. დაუშვებელია, რომ ყოველდღიურად, რამდენიმე საათის განმავლობაში 
  არაკომფორტულ სკამზე იჯდეთ. ეს ხელს შეუშლის არამხოლოდ თქვენს პროდუქტიულობას, არამედ თქვენს ჯანმრთელობასაც. ამიტომ დარწმუნდით, 
  რომ თქვენი ინვესტიცია ხარისხიან საოფისე სავარძელზე დაიხარჯება. რაც შეეხება დიზაინს, თუ ბიუჯეტი ხელს არ გიწყობთ, 
  აუცილებელი არაა ტყავის ავეჯის შეძენა, შედარებით დაბალ ფასად შეგიძლიათ, ტყავის შემცვლელი ქსოვილით დამზადებული სკამის შეძენაც.
• მაქსიმალურად აითვისეთ მაგიდის გარშემო არსებული სივრცე. ხშირად, შთამაგონებელი 
  იდეები ელვის სისწრაფით მოდის და მალევე ქრება. იმისთვის, რომ 
  სწრაფ-სწრაფად განახორციელოთ ჩანაფიქრები, სამუშაო დაფა გჭირდებათ. 
  გააფორმეთ კედელი დაფითა და ნახატებით, რათა ოთახში გაჩერება სასიამოვნო 
  და ჰარმონიული გახდეს.
• ეცადეთ, ოთახი თქვენთვის საყვარელი ფერებით, ხარისხიანი საღებავით გადაღებოთ და 60:30:10-ის წესი გამოიყენოთ, რაც გულისხმობს, რომ ოთახში 60% ძირითადი ფერი უნდა იყოს, მაგ: კედლები. 30% მეორე ფერით დატვირთეთ, - იატაკითან ავეჯით, 10%-ით კი აქცენტები გააკეთეთ, ეს შესაძლოა,
  კვლავ დეკორაციები ან ტექსტილი იყოს.

2025 წლის ტენდენციები, რომელიც სამუშაო სივრცის მოწყობაში დაგეხმარებათ

• რაც შეიძლება მეტი მწვანე სივრცე - რაც უფრო მეტი მცენარე გაქვთ სახლში, მით უფრო მშვიდი და კომფორტული ატმოსფერო იქმნება. გარდა ამისა, როგორც უკვე ვახსენეთ, მცენარეებს შეუძლიათ ბუნებრივი “ტიხრის” ფუნქცია შეითავსონ.
• ბუნებრივი მასალები - 2025 წელს, განსაკუთრებით მოთხოვნადია მუხის, ქვის და ნატურალური მასალების გამოყენება ავეჯის დიზაინსა და სახლის ინტერიერში.
• მინიმალისტური დიზაინი - მინიმალიზმი აქტუალობას არასდროს კარგავს. თუ ექსტრავაგანტულ სტილს ანიჭებთ უპირატესობას, გირჩევთ, ოთახი მხოლოდ რამდენიმე აქსესუარით დატვირთოთ, კედლები და დარჩენილი სივრცე კი დატოვოთ სადა, დახვეწილ ფერებსა და დეკორაციებში.