რა ჯდება 1 კვ.მ-ის რემონტი

აბაზანა და სამზარეულო სამუშაოების სირთულიდან გამომდინარე, შეგვიძლია, ყველაზე ძვირადღირებულ სივრცეებად მოვიაზროთ. თუმცა, რემონტის დროს ხარჯების განსაზღვრა, მაინც ბინის თავდაპირველი მდგომარეობის გათვალისწინებით ხდება.

რემონტი ნებისმიერი ჩვენგანის გონებაში სიახლეებთან, სიმყუდროვესთან, საოცნებო დიზაინის სახლთან და მეორე მხრივ, დიდ ხარჯებთან ასოცირდება. თუმცა, ყოველთვის ასე არ არის. სწორედ ამიტომ, აუცილებელია წინასწარ განვსაზღვროთ, რა მიზნით ვაკეთებთ რემონტს, რა პრიორიტეტები გვაქვს და რისი მიღწევა გვინდა სამუშაოების დასრულებისას.

პრაქტიკაში ორი ტიპის რემონტი არსებობს: კოსმეტიკური და კაპიტალური. იმისთვის, რომ ბიუჯეტი ეფექტურად გამოვიყენოთ, მათ შორის განსხვავება უნდა ვიცოდეთ, შემდეგ კი გადავწყვიტოთ, ჩვენს სივრცეს რომელი ესაჭიროება.

კოსმეტიკური - ძირითადად, არსებული იერსახის განახლებას და გაუმჯობესებას მოიცავს. მაგალითად, თუ სახლის ნებისმიერი ზონაში მეტი კომფორტისა და პრაქტიკულობის შეტანა გინდათ. უფრო კონკრეტულად კოსმეტიკური რემონტია:

• შპალერის შეცვლა და კედლების გადაღებვა
• იატაკის გადაკეთება
• ჭერის შეღებვა
• შიდა ელექტროობისა და სანტექნიკური სამუშაოების ჩატარება: ჰიდროდინამიკური გაწმენდა; წყლის ფილტრაციის მოწესრიგება; ნიჟარების შეცვლა და სხვ.
• განათებისა და დეკორატიული აქსესუარების შეცვლა.

კოსმეტიკური რემონტი უპრიანია მათთვის, ვინც ახლადშეძენილ, გარემონტებულ ბინაში გადავიდა და მცირე ცვლილებების შეტანა, ან საკუთარ გემოვნებაზე მორგება უნდა. ასევე, მათთვის, ვისაც ბინა საინვესტიციოდ უნდა და გაქირავებას/დაგირავებას გეგმავს. კარგი გამოსავალია ისეთი მაცხოვრებლებისთვისაც, რომლებსაც ბიუჯეტი და დრო შეზღუდული აქვს.

კაპიტალური - ბევრად უფრო ხარჯიანი, სერიოზული და გრძელვადიანი პროცვესია. უმეტესად მოიაზრებს:

• სარემონტო მასალების შერჩევა და დიზაინთან შეხამება;
• წყალგაყვანილობისა და ელექტროობის სისტემების შეცვლა;
• კედლების მოშლა ან პირიქით - ტიხრების დამატება;
• რიგ შემთხვევაში, თუ კერძო სახლი გვაქვს, სახურავის შეკეთება; თბო-ჰიდრო საიზოლაციო ფილებით შენობის მოპირკეთება და სხვ.

კაპიტალური რემონტით სარგებლობენ ადამიანები, რომლებიც ძველ კორპუსებში ცხოვრობენ და ასეთ დროს, სისტემების განახლება არათუ სასურველი, აუცილებელიც კია. ასევე მობინადრეები, რომლებსაც ბინის თავიდან ბოლომდე გადაკეთება სურთ ან სულაც, თუ ბინა შავი კარკასის მდგომარეობაში იყიდეს და თითქმის, ყველაფერი გასაკეთებელია.

რაც შეეხება იმას, თუ რა ჯდება ერთი კვადრატულის რემონტი, ამის პროგნოზირება სურვილებისა და საჭიროებების გარეშე რთულია და ისეთ ფაქტორებზეა დამოკიდებული, რაც უკვე განვიხილეთ.

ახლა შეგვიძლია, უფრო დეტალურად განვიხილოთ, რა განსხვავებაა თეთრ, შავ და მწვანე კარკასს შორის და რისი გაკეთება დაგვჭირდება თითოეულის შემთხვევაში.

შავი კარკასის ფასი როგორც წესი, ბევრად უფრო დაბალია, ვიდრე თეთრის, რადგან ბინის დასრულებამდე თითქმის ყველაფრის გაკეთება თავად მეპატრონეს უწევს. შავი კარკასის დროს, კედლები აშენებულია, შემოსასვლელი კარი დამონტაჟებული, ისევე, როგორც მეტალო-პლასტმასის ფანჯრები, თუმცა ელ.ენერგია და გათბობა ბინაში არ არის.

თეთრი კარკასის დროს დასრულებულია საშენებლო სამუშაოები: მოჭიმულია იატაკი, გალესილია კედლები, შეყვანილია წყალი და კანალიზაცია, ბინამდე მიყვანილია ელექტროენერგია და ბუნებრივი აირი, დასრულებულია როგორც შიდა, ასევე გარე ფასადი.

მწვანე კარკასი კი შესაძლოა ითქვას, ამ სამიდან სრულყოფილი მდგომარეობაა და საჭირო ხდება, მხოლოდ კოსმეტიკური რემონტი. ამ კონდიციაში ბინას ბუნებრივია, უფრო მაღალი ფასი აქვს.

იმისთვის, რომ ზუსტად გავიგოთ რა დაჯდება 1 კვ.მ-ის რემონტი, უნდა გავითვალისწინოთ ყველა ზემოხსენებული დეტალი და განვსაზღვროთ, ჩვენი ბინა რა კონდიციაშია და სამომავლოდ, როგორ გვინდა იყოს.

კერძო სახლის დიზაინი

კორპუსის სახლისგან განსხვავებით, კერძო სახლში შესაძლებელია, ინტერიერის და ექსტერიერის თავისუფლად დაგეგმარება. ჩვენს ნებაზეა დამოკიდებული, როგორ განლაგდეს ოთახები, რამდენი სართული იყოს, როგორი კარ-ფანჯარა შევარჩიოთ და საერთოდაც, მთლიანი დიზაინი, ბაღის სივრცე, ბაღის ავეჯი და ფილებიც კი, ინდივიდუალური სურვილის გათვალისწინებით იქმნება. ამიტომაც, ამ შემთხვევაში, მეტი ყურადღება გვმართებს.

კერძო სახლი ფუფუნებას გვაძლევს, რომ მაქსიმალურად დიდი ფანჯრები და ვიტრაჟები გამოვიყენოთ, რაც არამხოლოდ ვიზუალურად აფართოებს სივრცეს, არამედ ელ. ენერგიას ზოგავს და ესთეტიკურადაც, გარემოს მეტად მიმზიდველს ხდის.

იქედან გამომდინარე, რომ სივრცე ინდივიდუალურად არის დაორგანიზებული, სურვილის შემთხვევაში, შესაძლოა, თითოეულ საძინებელს საკუთარი სველი წერტილი ჰქონდეს, რისი საშუალებაც კორპუსში ნაკლებადაა.

ამასთან ერთად, ფართი საშუალებას იძლევა, სამუშაო კაბინეტიც კი მოვაწყოთ, რათა სახლიდან, დისტანციურად მუშაობის შემთხვევაში მეტად პროდუქტიულები ვიყოთ. კერძო სახლის კიდევ ერთი დადებითი მხარეა, რომ აღარ ვინერვიულებთ, თუ ჩვენი რჩეული საოფისე მაგიდა და სკამები პატარა სივრცეში ვერ ეტევა, რადგან ყველაფერი ჩვენს გათვლებზეა დამოკიდებული. შეგვიძლია, დიზაინშივე მოვაშოროთ ან დავამატოთ ტიხარი, თუ ეს საჭირო გახდა.

აბაზანის დიზაინი

აბაზანა, როგორც თავში ვახსენეთ, რემონტის დროს ერთ-ერთ ყველაზე ძვირადღირებულ სივრცედ მოიაზრება. საჭიროა, ვიცოდეთ სააბაზანოს ტიპები, რათა ზუსტად მოვარგოთ ჩვენს სივრცეს და თითოეული სანტიმეტრი ავითვისოთ.

• კუთხის აბაზანები ძირითადად მაშინ გამოიყენება, როცა ფართი პატარაა. შესაბამისად, იკავებს პატარა ადგილს და ხშირად, საშხაპე კაბინასთან ერთად იყიდება.
• კედელზე მისადგმელი აბაზანა კლასიკური ტიპის აბაზანა, რომლის ზომები 130-180 სანტიმეტრის ფარგლებში მერყეობს.
• ცალკე მდგომი აბაზანა ბევრად უფრო ძვირია, ვიდრე წინა ორი ვარიანტი. როგორც წესი, პრემიუმ ხარისხის მასალებისგან მზადდება და მეტ ადგილს იკავებს.
• ჯაკუზი ყველასთვის სასურველი აბაზანაა წყლის მასაჟორებით, რომელიც შესაძლოა იყოს, როგორც კედელზე მისადგმელი, ასევე ცალკე მდგომი. მისი ფასიც, ცხადია ბევრად მაღალია, რადგან ფუფუნებასთან და დასვენებასთან ასოცირდება. სანამ აბაზანის ავეჯზე გადავალთ, არ უნდა გამოგვრჩეს საკმაოდ ხარჯიანი პროცედურები, როგორიცაა: მილსადენის გაყვანა; ტრაპისა და საკანალიზაციო სისტემის გაკეთება; კედლის ფილების შერჩევა; ნიჟარის, აბაზანის, უნიტაზის, საშრობის დაყენება და სხვ.

კაფელ-მეტლახი

სველი წერტილებისთვის კედლის ფილების (კაფელის) შერჩევას დიდი ყურადღება და დაკვირვება სჭირდება. პირველ რიგში, უნდა ვიცოდეთ განსხვავება კერამიკულ ფილებს შორის, რადგან ისინი სახლის სხვადასხვა ზონისთვის, განსხვავებული ტექნოლოგიით იწარმოება.

კაფელი იდეალური ვარიანტია აბაზანისთვის, რადგან:

• უძლებს წყალსა და ნესტს;
• უძლებს მაღალ ტემპერატურასა და ცეცხლის ალს;
• თითქმის არ იცვითება;
• მარტივად იწმინდება;

გთავაზობთ რამდენიმე რჩევას, რომელიც კაფელის შეძენისას უნდა გაითვალისწინოთ: გლუვი ფილები - ხშირად უფრო მდიდრულად და ხარისხიანად გამოიყურება, ვიდრე პრიალა. გარდა ამისა, მასზე ჭუჭყის შემჩნევა უფრო რთულია; ზომა - გაითვალისწინეთ, რომ დიდი ზომის ფილები მეტად ჰარმონიულ ვიზუალს გაძლევთ; ფერი - რა თქმა უნდა, კედლის ფილები თქვენი აბაზანისა და სახლის დანარჩენი ზონების დიზაინს უნდა შეუხამოთ, თუმცა ყურადღება მიაქციეთ იმას, რომ ღია ფერის ფილებს ლაქები ნაკლებად ემჩნევა, ვიდრე მაგალითად შავს.

ეზოს დეკორაცია

ბაღის დეკორაციის შექმნა და შემდეგ მისი მოვლა, შრომატევადი და დამღლელი საქმიანობაა. სანამ მას დავაპროექტებთ, უნდა განვსაზღვროთ, თუ რა დატვირთვა ექნება ჩვენს ეზოს. მაგ: გასართობი, მოსასვენებელი, საბავშვო თუ სპორტული.

ბაღის ვიზუალში უდიდესი მნიშვნელობა ენიჭება გარე განათებას, მათ შორის, დეკორატიული და ფუნქციური განათების სწორად შერჩევას. ფუნქციური განათება აუცილებელია ბილიკებთან, დეკორატიული კი ისეთ სივრცეებთან ახლოს, სადაც მცენარეები და სხვადასხვა აქსესუარებია განლაგებული.

• დეკორაციის გარდა, მნიშვნელოვანია, რომ გარე ავეჯი სწორად შევარჩიოთ. გასაშლელი მაგიდები და სკამები ღია სივრცისთვის უფრო მომგებიანია: ზოგავთ ადგილს და იყენებთ სხვადასხვა ფუნქციით.
• ზამთარში ხშირი წვიმისა და თოვლის პირობებში, ხშირად ავეჯი ზიანდება, ამიტომ აუცილებელია, ბაღის ავეჯი გამძლე და ხარისხიანი მასალით იყოს შექმნილი, როგორიცაა მეტალი, ხე, ხელოვნური როტანგი და სხვ. აქვე, ისიც უნდა ითქვას, რომ შრომა წყალში ჩაგეყრებათ, თუ ყურადღებას მხოლოდ ავეჯს და ესთეტიკას დაუთმობთ, რადგან საჭიროა ყველა სეზონზე მცენარეების მოვლა: გასხვლა-ფორმირება, მორწყვა, სარეველა ბალახის მოშორება, საკვები დანამატების მომარაგება და სხვ. რისთვისაც აუცილებელია, ბაღის ინვენტარი სწორად და დაკვირვებით შეარჩიოთ.