შევარჩიოთ ფერები დახვეწილი ინტერიერისთვის

ფერების სწორად შერჩევა მყუდრო სახლის შექმნისთვის აუცილებელი წინაპირობაა, რათა თითოეული დეტალი თქვენს გემოვნებას, ინტერესსა და მისწრაფებას შეესაბამებოდეს. გადაწყვეტილების მიღებისას რისკებს არ შეუშინდეთ და თამამად იმოქმედეთ. თუმცა, მანამ, სანამ საღებავს და დიზაინს შეარჩევთ, კარგად გაეცანით ფერების ფსიქოლოგიას: საქმე ხომ თქვენს სახლს ეხება - ადგილს, სადაც დღის უმეტეს ნაწილს გაატარებთ. ამიტომ უნდა დარწმუნდეთ, რომ შერჩეული ფერები თანაბრად აღძრავს თქვენში პოზიტიურ განწყობას, სიმშვიდესა და ჰარმონიულობის შეგრძნებას.

ამ ბლოგში მოგიყვებით, რა დატვირთვა აქვს და როგორ შევარჩიოთ ფერები სასურველი ინტერიერისთვის.

• სინათლე - თუ ოთახში ბუნებრივი სინათლე კარგად აღწევს, შეგიძლიათ, მუქი ფერები თქვენი გემოვნების მიხედვით გამოიყენოთ. ხოლო თუ ნაკლებია, ეცადეთ, ისეთი ტონალობები აარჩიოთ, რაც თქვენს ოთახს უფრო ნათელს და სასიამოვნოს გახდის.
• კომბინაცია - ადამიანებს ხშირად ჰგონიათ, რომ მხოლოდ ერთი ფერის გამოყენება ოთახს უფრო დახვეწილს ხდის. არადა, რამდენიმე ფერის გემოვნებიანი კომბინაციით მეტად მრავალფეროვანი გარემოს შექმნა შეგიძლიათ. შეგიძლიათ დატვირთოთ ერთი კედელი რამდენიმე ფერის გამოყენებითა და დეკორატიული აქსესუარებით.
• ინდივიდუალიზმი - სახლში დროის სასიამოვნოდ გატარების საუკეთესო გზა ინტერიერის თქვენს თავზე მორგებაა. გააკეთეთ ექსპერიმენტები: თავდაპირველად, იყიდეთ მინიმალური ოდენობის საღებავი და სცადეთ მანამ, სანამ არ მიხვდებით, რომ „ეს ის ფერია“

რაც შეეხება კედლისა და დეკორაციის ფერებს:

• წითელი ფერი ენერგიულობის სიმბოლოა. შეუძლია გამოიწვიოს როგორც დადებითი, ასევე უარყოფითი ემოციები. ამ ფერს ხშირად იყენებენ სწრაფი კვების ობიექტები.
• მწვანე ფერი ყველაზე ხშირად ასოცირდება სიახლესთან და სიმშვიდესთან. ღია ტონალობის გამოყენება საძინებლისთვის იდეალური გამოსავალია, რადგან ხელს უწყობს სივრცეში სიმშვიდის შემოტანას და სასიამოვნო ატმოსფეროს შექმნას.
• ლურჯი მშვიდობისა და სტაბილურობის ფერია, რაც თქვენს სახლს ელეგანტურ და მდიდრულ იერსახეს მიანიჭებს. თუმცა, ტონალობები აქაც უნდა დავარეგულიროთ: მისაღებში და საძინებელში ჯობს, უფრო ღია ფერის ლურჯი გამოიყენოთ, სამზარეულო კი შეგიძლიათ, მუქი ლურჯით დატვირთოთ.
• ვარდისფერი სინაზესა და ჰაეროვნებასთან ასოცირდება. შესანიშნავია ბავშვების საძინებლებისთვის ან სახლის სხვა ზონებისთვის, სადაც დინამიკური და თბილი გარემოს შექმნა გსურთ.

გაითვალისწინეთ, რომ კლასიკური ფერების კომბინაცია არასდროსაა ზედმეტი. მაგალითად, თეთრის და ლურჯის ერთიანობა სისუფთავის და სინათლის შთაბეჭდილებას ტოვებს. ჰარმონიული ინტერიერისთვის, შეგიძლიათ გამოიყენოთ თეთრი კედლები და ლურჯი თეთრეული ან აქსესუარები.