როგორ შევარჩიოთ მტვერსასრუტი

მტვერსასრუტი ნებისმიერ სახლში უმნიშვნელოვანესი საყოფაცხოვრებო ტექნიკაა. აუცილებელია, სწორად შეარჩიოთ მოდელი, რომელიც სამომავლოდ თქვენი სახლის სისუფთავეს განსაზღვრავს. ამ ბლოგში გაგიზიარებთ საჭირო რჩევებსა და რეკომენდაციებს, როგორ შეარჩიოთ თქვენს საჭიროებებზე მორგებული მტვერსასრუტი, რომელიც სახლში თქვენი მარჯვენა ხელი გახდება.

მტვერსასრუტის მრავალფეროვანი ასორტიმენტიდან საუკეთესოს შესარჩევად, ტიპებს შორის განსხვავება უნდა იცოდეთ.

• ცილინდრული მტვერსასრუტი - გამძლე და სხვებთან შედარებით ბიუჯეტური ვარიანტია. ცილინდრული მოდელებიდან ზოგიერთს ტომრების ხშირი გამოცვლა ესაჭიროება, ზოგიერთს კი არა. ამიტომ, სანამ ყიდვას გადაწყვეტთ, გაითვალისწინეთ, რომ ტომრების გამოცვლა დამატებითი ხარჯია.
• ციკლონური მტვერსასრუტს ტომრების შეცვლა არ სჭირდება, რადგან ჰაერის სწრაფი ცირკულაციის პრინციპზე მუშაობს და მტვერს სპეციალურ კონტეინერში აგროვებს. ამ შემთხვევაში, მოდელები განსხვავდება ჭუჭყის შესაგროვებელი სათავსოს ტევადობით. მისი უპირატესობაა, რომ მძლავრი შეწოვა აქვს და შესანიშნავად უმკლავდება წვრილ მტვერს, როგორიც არის მაგალითად დივანზე, ხალიჩებზე, და საოჯახო ტექსტილზე. გარდა ამისა, ფილტრები რეცხვადი და ხელახლა გამოსაყენებელია. დააკვირდით, რომ კაბელი გრძელი იყოს, რათა თქვენც მოხერხებულად მიუდგეთ ნებისმიერ წერტილს.
• ვერტიკალურ მტვერსასრუტს განიერი წმენდის არეალი აქვს, ამიტომ იდეალურია რთულად მისადგომი ადგილებისა და კუთხეებისთვის. არც ამ მოდელებისთვისაა საჭირო ტომრები, რადგან აპარატში პლასტმასის უდმივი ფილტრია ინტეგრირებული. როგორც წესი, ასეთი ტიპის მტვერსასრუტს სამკუთხედი საცმიც მოყვება, რომელიც ვიწრო ადგილებში დასუფთავებას გაგიადვილებთ. აქვს თანამედროვე და დახვეწილი დიზაინი.
• უსადენო მტვერსასრუტი ნამდვილად საუკეთესო გამოგონებაა. კარგი ვარიანტია სწრაფი დასუფთავებისთვის. მათი უპირატესობა სიმსუბუქე და მოქნილად გამოყენების ფუნქციაა. მაგალითად, მაშინაც შეგიძლიათ გაწმინდოთ იატაკი, როცა დენი არ არის. თუმცა, უარყოფითი მხარეებიც აქვს: შეზღუდული დრო და შედარებით ნაკლები სიმძლავრე. თუ მტვერსასრუტი 45 წუთი იმუშავებს, დასატენად შესაძლოა, 5 საათი მაინც დაგჭირდეთ.
• რობოტი, იგივე ჭკვიანი მტვერსასრუტი 21-ე საუკუნის ერთ-ერთი ყველაზე ინოვაციური გამოგონებაა. თუ უსადენო მტვერსასრუტი 45 წუთი მუშაობს და მაინც 5 საათი იტენება, ჭკვიანი მტვერსასრუტი მინიმუმ 100-170 წუთს ძლებს. ერთდროულად აქვს მშრალი და სველი წმენდის ფუნქცია, სიმძლავრის მომატება კი როგორც წესი, ავტომატურად ხდება. მტვერსასრუტი მართლაც იმდენად ჭკვიანია, თავად შეუძლია ოთახების გაყოფა და ზონირებული წმენდა, ასევე ხალიჩის კუთხეების დეტექცია და მათზე თავის არიდება. ერთი სიტყვით, ჭკვიანი რობოტი დამოუკიდებლად დაასუფთავებს მთელს სახლს. ყველაზე მნიშვნელოვანია, რომ აქვს აპლიკაციით მართვის შესაძლებლობა.

მახასიათებლები, რომლებიც მტვერსასრუტს აუცილებლად უნდა ჰქონდეს

სიმძლავრე როგორც წესი, 1600-დან 2500 ვატამდე მერყეობს, თუმცა მაღალი ვატები აპრიორი უკეთეს შეწოვას არ ნიშნავს. თანამედროვე ტექნოლოგიით შექმნილმა მოდელებმა შესაძლოა, ნაკლები სიმძლავრით მიაღწიონ სასურველ შედეგს, თანაც განახევრებულ დროში. 

ეცადეთ, რომ მოძებნოთ ოპტიმალური მტვერსასრუტი, რომლის სიმძლავრის რეგულირებაც შეგეძლებათ. ასე, ხალიჩებისთვის შეძლებთ მაღალი სიმძლავრის წმენდა გამოიყენოთ, დივანისთვის და ზედაპირებისთვის კი ნაკლები სიმძლავრის.

ფილტრაცია

უმნიშვნელოვანესი დეტალი, რომელიც ვიზუალურად არ ჩანს, მაგრამ აუცილებლად უნდა იცოდეთ, მაღალი ხარისხის ფილტრაციის ფუნქციაა. 

HEPA (High-Efficiency Particulate Air) ფილტრები მტვრის ნაწილაკების 99.97%-ს ისრუტავს, რაც ალერგიის მქონე პირებისთვის ნამდვილი მისწრებაა. მტვერსასრუტის მოდელების შერჩევისას, შეხვდებით მიკროფილტრებსაც, რომელთაც მართალია, ეფექტურობას ვერ დავუწუნებთ, თუმცა ვერც Hepa ფილტრებს შევადარებთ.

ხმაური

თუხმაურზე გართულებაგაქვთ, ტრადიციული მტვერსასრუტის მოდელებიარ გამოგადგებათ. საშუალოდ, ჩვეულებრივი მტვერსასრუტი 70-80 დეციბელ ხმას წარმოქმნის,რაც საკმაოდ ბევრია. თუ ეს თქვენთვის პრობლემაა, ეძებეთ ისეთი, მოდელები, რომლებიც 65 დეციბელზე ნაკლებ ხმას გამოსცემს.

ტომრის ტევადობა

თუ თანხას დაზოგავთ და ისეთ მოდელს აარჩევთ, რომელზეც დასაწყისში ვისაუბრეთ, ტომრების ტევადობა უნდა გაითვალისწინოთ. საშუალო ზომის ოჯახისთვის, 2-4 ლიტრის მოცულობა საკმარისია. დიდი სახლის ან ხშირი გამოყენების შემთხვევაში, უმჯობესია დიდი მოცულობის (4+ ლიტრი) კონტეინერის მქონე მოდელის შერჩევა. ამასთან ერთად, გაითვალისწინეთ მტვერსასრუტის წონა და ბორბლების ხარისხი. კარგი მოდელი უნდა იყოს მსუბუქი და ადვილად მოძრავი, განსაკუთრებით, თუ სახლში კიბეები ან რთულად მისადგომი ადგილები გაქვთ.

დამატებითი აქსესუარები

ჩვეულებრივ, ბრენდულ მაღაზიებში შეძენისას, მტვერსასრუტს თავისი აქსესუარები მოყვება, თუმცა, მაინც გიზიარებთ იმ ძირითად სიას, რომელიც ყიდვის დროს გამოგადგებათ:

• ხალიჩების საწმენდი ჯაგრისი
• ავეჯის საწმენდი ჯაგრისი
• მტვერსასრუტის ტომარა

რა უნდა გაითვალისწინოთ მტვერსასრუტის შეძენისას

საცხოვრებელი სივრცის ზომა

მცირე ბინისთვის კომპაქტური, პორტატული ან უკაბელო მტვერსასრუტი გეყოფათ. თუ დიდი სახლი გაქვთ, უმჯობესია უფრო მძლავრი, მაღალი მოცულობის კონტეინერის მქონე მოდელი განიხილოთ.

იატაკის ფორმა და ხალიჩები

თუ სახლში ბევრი ხალიჩა გაქვთ, კარგი შეწოვის მქონე მტვერსასრუტი დაგჭირდებათ, რომელსაც მბრუნავი ჯაგრისი აქვს. რაც შეეხება იატაკს, დარწმუნდით, რომ მტვერსასრუტს სპეციალური თავი აქვს, რომელიც ზედაპირს არ გაკაწრავს და არც დააზიანებს.

შინაური ცხოველები

თუ შინაური ცხოველები გყავთ, განიხილეთ ისეთი მოდელები, რომლებიც სპეციალურად ბეწვის მოსაშორებლადაა შექმნილი. ასეთი ტიპის მტვერსასრუტები უმეტესწილად აღჭურვილია სპეციალური ჯაგრისებით და უკეთესი ფილტრაციის ფუნქციით.