როგორ მოვაწყოთ საძინებელი ეფექტურად, როცა სივრცე შეზღუდულია

იმისთვის, რომ კომფორტულად იცხოვროთ და თქვენი სახლის ნებისმიერი ზონა ესთეტიკურად გამოიყურებოდეს, საჭირო არაა, 100 და 200 კვ.მ ფართს ფლობდეთ. ის კი აუცილებელია, რომ პატარა სივრცის თითოეული სანტიმეტრი აითვისოთ და ჭკვიანურად გამოიყენოთ.

ტანსაცმლის საკიდი, საგარდერობე ზონა, კომოდი, მაგიდა და სკამები - ყველაფრის ერთად დატევა მცირე ზომის ოთახში რთულია და თუ იმ ხრიკებს გულმოდგინედ არ წაიკითხავთ, რომელსაც ამ ბლოგში გაგიზიარებთ, ფაქტობრივად - შეუძლებელიც. 

იმისთვის, რომ ოთახის განახლებიდან ერთ კვირაში სინანული არ შემოგაწვეთ, - უფრო მეტი ან ნაკლები თარო უნდა დამემზადებინა, ან კომოდი იატაკის ფერისთვის შემეხამებინა და ასე უფრო მიმზიდველი სივრცე გამოჩნდებოდაო, დეტალურად გაგიზიარებთ რჩევებს, რომლებიც ამ რთულ და ბოლოს სასიამოვნო პროცესში, თქვენი გზამკვლევი გახდება.

სარკის ეფექტი 

გარდერობზე სარკის მიმაგრებას ნამდვილად აქვს ერთი უარყოფითი მხარე: ყოველ ჯერზე, როცა ტანსაცმელს ეძებთ ან უბრალოდ კარს ხსნით, ისვრება ან ილაქება. სამაგიეროდ, უამრავი დადებითი მხარეც აქვს: არც წმენდა მოითხოვს დიდ ძალისხმევას, არც ცალკე გიწევთ სარკის დადგმა და შესაბამისად, ოთახში ადგილი გეზოგებათ. გარდა ამისა, იქმნება ილუზია, რომ ოთახი უფრო დიდი და ნათელია. 

გადავიდეთ ტანსაცმელზე - თუ პინტერესტზე ინსპირაციულ და ტრენდულ ფოტოებს გადააწყდით და გადაწყვიტეთ, რომ გარდერობს ტანსაცმლის საკიდი გირჩევნიათ, რამდენიმე ვარიანტს შემოგთავაზებთ. პირველია კედელზე დასამაგრებელი საკიდი, რომელიც როგორც წესი, სტანდარტულზე მაღლა დამონტაჟდება. იდეალურია ქურთუკებისთვის, კაბებისთვის და გრძელი ტანსაცმლისთვის. მეორე ვარიანტია ორმაგი ტანსაცმლის საკიდი, რომელიც ასევე კედელზე დამონტაჟდება, თუმცა ორი განყოფილებით, ზედა და ქვედა. ზემოთ შეგიძლიათ, როგორც წინა შემთხვევაში, გრძელი ტანსაცმელი დაკიდოთ, ქვემოთ კი პერანგები, მაისურები, რომლებიც ადვილად იკუჭება ან კლასიკური შარვლები. მესამე ვარიანტია მოძრავი ტანსაცმლის საკიდი, რომელიც სულ უფრო და უფრო პოპულარული ხდება. მისი გადაადგილება მარტივია, შეგიძლიათ დღეს ოთახის ერთ წერტილში დადგათ, ხვალ კი მეორეში. ამასთან, არსებობს უამრავი ფერის, ფორმის, სიგრძის და სიგანის მოდელები, რომლებიც შეგიძლიათ, თქვენი ბიუჯეტისა და გემოვნების გათვალისწინებით შეარჩიოთ.

თუ ოთახში სივრცე არ გყოფნით და ვერ დგამთ დამატებით მაკიაჟის მაგიდას, ამიტომ, არ იცით სად შეინახოთ სამკაულები, რომ არც დაგეკარგოთ და თან - ყველას კარგად ხედავდეთ, ხელის ბეჭდის დამჭერი თქვენთვის იდეალური ვარიანტია. შეგიძლიათ, დადგათ როგორც ტუმბოზე, კომოდზე ან ნებისმიერ ზედაპირის მქონე საგანზე, რომელიც ოთახში მოგეპოვებათ. ასე უჯრებსაც დაზოგავთ და დეკორატიულ ნივთსაც შემატებთ ოთახს, მეტი სილამაზისთვის.

მაქსიმალურად გამოიყენეთ სივრცე ვერტიკალურად - ჩააშენეთ თაროები სიგრძეზე. ეს იდეა განსაკუთრებით გამოგადგებათ, თუ ოთახს გამოწეული კუთხეები ან ისეთი ადგილები აქვს, ვერც ვერაფერს დგამთ, რადგან ზომებში ვერ ეტევით და არც სივრცის დაკარგვა გინდათ.

მრავალფუნქციური ავეჯი და განათება

არასდროს არ შეხედოთ ავეჯს ისე, თითქოს მხოლოდ ერთი დანიშნულებისთვის გინდათ. 21-ე საუკუნეში უამრავი მრავალფუნქციური ნივთი არსებობს და თანაც, საკმაოდ ხელმისაწვდომ ფასად. შეიძინეთ საწოლი უჯრებით ან სპეციალური სათავსოებით, რომელშიც არასეზონურ ტანსაცმელს და გამოუყენებელ ნივთებს ჩადებთ. ეს ცხოვრებას გაგიმარტივებთ.

განათება - სივრცის გასაზრდელად განათების სწორად შერჩევა აუცილებელი წინაპირობაა. ცივი განათება ძირითადად, მაღალჭერიან ბინებშია რეკომენდებული, ვინაიდან კარგად იშლება და სივრცესაც ბევრად დიდს აჩენს. შეგიძლიათ, Led ნათურაც გამოიყენოთ და კედლის განათებაც, რათა თქვენს ხასიათს და საჭიროებას ნებისმიერ დროს მოარგოთ.

თუ საკიდებს კარით არ დაფარავთ და ღიას დატოვებთ, ეცადეთ, მეტი ღია თაროები ოთახში აღარ დაამატოთ, ან ისეთი უჯრები, საიდანაც ყველაფერი ჩანს. ასე, სივრცეში არეულობას შემოიტანთ და მაშინაც კი, როცა იდეალურადაა დალაგებული, ისეთი შეგრჩნება გრჩება, თითქოს უწესრიგობაა, ნივთები კი იმდენად ბევრია, ადგილი უფრო პატარა გეჩვენებათ.

აირჩიეთ ერთი სტილი, მაგალითად - მინიმალისტური. მინიმალიზმი მოდიდან არასდროს გადადის. თუ მაინც და მაინც ექსტრავაგანტულ დიზაინს ანიჭებთ უპირატესობას, შეგიძლიათ ერთ კედელზე დეკორატიული პანელი გამოიყენოთ. ასე მეტ ინდივიდუალიზმსა და უნიკალურობას შესძენს ოთახს და თან, არც გადაამლაშებს. გარდა ამისა, მათი გამოყენება ძალიან მარტივია, ინსტალაცია ზედმეტ ძალისხმევას არ საჭიროებს და ნებისმიერ ადამიანს შეუძლია, კვალიფიკაციის გარეშე მისი გამოყენება. დეკორატიული პანელის კიდევ ერთი უპირატესობაა, რომ ნესტგამძლე და ღებვადია.

მაგიდისა და გარდერობის გაერთიანება - დღეს, როცა დისტანციურად მუშაობა ჩვეულებრივ მოვლენად იქცა, სამუშაო მაგიდისა და საგარდერობე სივრცის გაერთიანება სივრცის დასაზოგად იდეალური საშუალებაა. ამის ერთ-ერთი გზაა გარდერობის ერთი ნაწილის გამოყოფა თაროებით და გასაშლელი, ან დასაკეცი მაგიდით. ეს უკვე თქვენს ნებასა და სურვილზეა დამოკიდებული. ასე შეძლებთ თქვენი სამუშაო ადგილი ვიზუალურად ესთეტიკურად და თან მოხერხებულად იყოს ინტეგრირებული საძინებელში, თქვენსავე ტანსაცმლის კარადასთან